നന്ദി കാണിക്കാം, നന്ദിയുള്ളവരാകാം...

റമളാൻ വസന്തം- 24

അമീൻ തിരുത്തിയാട്

  നമ്മെ സൃഷ്ടിച്ചത് അല്ലാഹുവാണ്. അത് പോലെ തന്നെ ഈ പ്രപഞ്ചത്തിലുള്ള സർവചരാചരങ്ങളെയും സൃഷ്ടിച്ചതും അല്ലാഹു തന്നെ. എത്രയെത്ര അനുഗ്രഹങ്ങളാണ് അല്ലാഹു നമുക്ക് ചെയ്തു തന്നിട്ടുള്ളത്? ആ അനുഗ്രഹങ്ങൾക്കെല്ലാം നാം അല്ലാഹുവിനോട് നന്ദികാണിക്കാറുണ്ടോ?
  ഈ ഭൂമിയിലുള്ള സകല വസ്തുക്കളെയും അല്ലാഹു മനുഷ്യന് വേണ്ടിയാണ് സൃഷ്ടിച്ചത്. ആ വസ്തുക്കളെല്ലാം ഉപയോഗിക്കുന്ന നാം അതെല്ലാം നമുക്ക് വേണ്ടി സംവിധാനിച്ച് തന്ന റബ്ബിനെ ഓർക്കാറുണ്ടോ?
  അല്ലാഹു മനുഷ്യന് നൽകിയ അനുഗ്രഹങ്ങളിൽ വളരെ പ്രധാനപ്പെട്ട ഒന്നാണ് അവന്റെ ശരീരം. ആയിരക്കണക്കിന് കിലോമീറ്റർ നീളം വരുന്ന നാഡീ-ഞരമ്പുകളും രക്തക്കുഴലുകളും കുടലുകളുമെല്ലാം എത്ര കൃത്യമായിട്ടാണ് അവൻ സംവിധാനിച്ചത്? അതെ മനുഷ്യനെ അവൻ ഏറ്റവും ഉത്തമമായ രീതിയിലാണ് സൃഷ്ടിച്ചത്. അവന്റെ സൃഷ്ടികളുടെ കൂട്ടത്തിൽ ഏറ്റവും അംഗീകാരവും മനുഷ്യന് നൽകി. മനുഷ്യനെ അവൻ ആദരിച്ചു. പഠിക്കുവാനും മനസ്സിലാക്കുവാനും ചിന്തിക്കുവാനും ബുദ്ധിയും വിവേകവും നൽകി. കാഴ്ചയും കേൾവിയും ഹൃദയവും നൽകി. ശ്വസിക്കുവാനുള്ള വായുവും കുടിക്കാനുള്ള വെള്ളവും ഭക്ഷണവും നൽകി. അവൻ നൽകിയ ഓരോ അനുഗ്രഹത്തിനും അവയെപ്പറ്റി മനസിലാക്കിയിട്ട് നാം നന്ദികാണിക്കണം. അങ്ങനെ നാം അല്ലാഹുവിന്റെ അനുഗ്രഹങ്ങൾക്ക് നന്ദി കാണിച്ചാൽ അവൻ നമുക്ക് വീണ്ടും വീണ്ടും അനുഗ്രഹങ്ങൾ നൽകും.
  അത് കൊണ്ട് തീർച്ചയായും അനുഗ്രഹങ്ങൾക്ക് നന്ദി കാണിക്കുക. ആ അനുഗ്രഹങ്ങളെപ്പറ്റിയെല്ലാം നാളെ അല്ലാഹു നമ്മോട് ചോദ്യം ചെയ്യുന്നതാണ്. നന്ദിയുള്ള അടിമകളാവുക. നാഥൻ അനുഗ്രഹിക്കട്ടെ...