പരീക്ഷണ കാലത്തെ റമളാൻ വ്രതം

റമളാൻ വസന്തം 2

✍️ അമീൻ തിരുത്തിയാട്


  പുണ്യങ്ങളുടെ പൂക്കാലമാണ് പരിശുദ്ധ റമളാൻ മാസം. രാവിലെ മുതൽ വൈകുന്നേരം വരെ പട്ടിണി കിടന്ന് കൊണ്ട് ദൈവ പ്രീതി മാത്രം ആഗ്രഹിച്ച് ചെയ്യുന്ന ഒരു ആരാധനാ കർമ്മം.

  ഇങ്ങനെയുള്ള റമളാൻ മാസത്തിലാണ് ഇസ്ലാമിക ചരിത്രത്തിലെ പലയുദ്ധങ്ങളും നടന്നത്. റമളാൻ മാസം പതിനേഴിനായിരുന്നു മക്കാ മുശ്രിക്കുകളുമായി പ്രവാചകൻ (സ്വ) ആദ്യമായി ഏറ്റുമുട്ടിയത്. അന്ന് ഞങ്ങൾ വ്രതമനുഷ്ഠിച്ചവരാണെന്ന് പറഞ്ഞ് കൊണ്ട് ആരും യുദ്ധത്തിൽ നിന്നും മാറി നിന്നിട്ടില്ല.

  ഇന്ന് നമ്മുടെ നാട് മാരകമായ ഒരു വൈറസ് മൂലം പരീക്ഷണ ഘട്ടത്തിലൂടെയാണ് കടന്ന് പോകുന്നത്. ഈ അവസരത്തിൽ എന്റെ നാട്ടിൽ രോഗമാണ് അല്ലെങ്കിൽ എന്റെ രാജ്യത്ത് രോഗമുണ്ടെന്ന് പറഞ്ഞ് കൊണ്ട് വ്രതമനുഷ്ഠിക്കാതെ മാറി നിൽക്കൽ നമുക്ക് അനുവദനീയമല്ല. അല്ലാഹു നമ്മെ പഠിപ്പിച്ചത് റമളാനിൽ രോഗം ബാധിച്ചത് കൊണ്ടോ, യാത്രയിലായത് മൂലമോ ഒരാൾക്ക് വ്രതമനുഷ്ഠിക്കാൻ സാധിച്ചില്ലായെങ്കിൽ നഷ്ടമായ നോമ്പുകൾ പിന്നീട് നോറ്റുവീട്ടണമെന്നാണ്. അല്ലാതെ ലോകത്തെവിടെയോ രോഗമുണ്ടെന്ന് പറഞ്ഞ് വ്രതമനുഷ്ഠിക്കാതിരിക്കണം എന്നല്ല.

സൂറത്തുൽ ബഖറയിലെ 155 ആം വചനത്തിൽ നമുക്ക് കാണാം.

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ ۗ وَبَشِّرِ الصَّابِرِينَ
"കുറച്ചൊക്കെ ഭയം, പട്ടിണി, ധനനഷ്ടം, ജീവ നഷ്ടം, വിഭവ നഷ്ടം എന്നിവ മുഖേന നിങ്ങളെ നാം പരീക്ഷിക്കുക തന്നെ ചെയ്യും. (അത്തരം സന്ദര്‍ഭങ്ങളില്‍) ക്ഷമിക്കുന്നവര്‍ക്ക് സന്തോഷവാര്‍ത്ത അറിയിക്കുക"
  തീർച്ചയായും വിവിധ രൂപത്തിൽ അല്ലാഹു നമ്മെ പരീക്ഷിക്കുക തന്നെ ചെയ്യും... ഭയം കൊണ്ടും പട്ടിണി കൊണ്ടും ദാരിദ്ര്യം കൊണ്ടും ആളുകളിൽ സംഭവിക്കുന്ന ദുരന്തങ്ങൾ കൊണ്ടും സുഹൃത് ബന്ധങ്ങൾ കൊണ്ടുമെല്ലാം അല്ലാഹു നമ്മെ പരീക്ഷിക്കും... ഇത്തരം സന്ദർഭങ്ങളിൽ ക്ഷമിക്കാനും സഹിക്കാനും നമുക്ക് സാധിക്കണം... എങ്കിൽ നമുക്ക് വിജയമുണ്ടാകും...
  "ക്ഷമാലുക്കളായ ആളുകൾക്ക് അവരുടെ പ്രതിഫലം കണക്കില്ലാതെ നൽകുന്നതാണ്..." ക്ഷമിക്കുന്ന ആളുകൾക്കുള്ള വമ്പിച്ച പ്രതിഫലത്തെയാണ് ഈ ആയത്തിലൂടെ സൂചിപ്പിക്കുന്നത്.
  അത് കൊണ്ട് തന്നെ നമ്മെ ബാധിക്കുന്ന പരീക്ഷണങ്ങളിൽ ക്ഷമ കൈകൊള്ളുകയും ജീവിതമാകുന്ന പരീക്ഷയിൽ വിജയിക്കുകയും ചെയ്യാം...

  നാഥൻ അനുഗ്രഹിക്കട്ടെ....