നമുക്ക് വേണം ചില മാറ്റങ്ങൾ...

റമളാൻ വസന്തം- 30

അമീൻ തിരുത്തിയാട്

  നാഥന്റെ അപാരമായ അനുഗ്രഹം കൊണ്ട് നമുക്ക് ബോണസായി പരിശുദ്ധ റമളാനിൽ ഒരു ദിവസം കൂടി ലഭിച്ചിരിക്കുകയാണ്.
അൽഹംദുലില്ലാഹ്... അധികം ലഭിച്ച ഒരു ദിവസം കൂടി നമുക്ക് നമ്മുടെ റബ്ബിലേക്കടുക്കാം. ഒരു പക്ഷേ അടുത്ത റമളാനിൽ നാം ഉണ്ടാകണം എന്നില്ല.
  ഈ റമളാൻ പിരിഞ്ഞ് പോവുമ്പോൾ നമ്മുടെ ജീവിതത്തിൽ ചില മാറ്റങ്ങൾ ഒക്കെ ഉണ്ടായി തീരണം. ഒരു റമളാൻ നമ്മിലൂടെ കടന്ന് പോയി എന്നറിയിക്കാവുന്ന എന്തെങ്കിലും മാറ്റങ്ങൾ.
  മഹാനായ അബുദ്ദർദാഅ(റ) പറയുന്നതായി നമുക്ക് കാണാം.
قال أبى الدرداء (ر): أوصاني خليلي (صلعم) بثلاثٍ. بصومٍ ثلاثة أيّامٍ من كلّ شهر، والوتر قبل النوم، وركعتي الفجر
" അബിദ്ദർദാഅ(റ) പറയുന്നു: എന്റെ സുഹൃത്ത് പ്രവാചകൻ(സ്വ) മൂന്ന് കാര്യങ്ങൾക്കൊണ്ടെന്നെ വസ്വിയത്ത് ചെയ്തു. ഓരോ മാസവും മൂന്ന് ദിവസത്തെ നോമ്പ്, ഉറക്കത്തിന് മുമ്പുള്ള വിത്റ് നമസ്കാരം, സുബ്ഹിക്ക് മുമ്പുള്ള രണ്ട് റക്അത്ത് നമസ്കാരം എന്നിവയായിരുന്നു ആ കാര്യങ്ങൾ"
  ഇനി നാം നമ്മുടെ ജീവിതത്തിലേക്ക് നോക്കുമ്പോൾ, കഴിഞ്ഞ ഒരു മാസക്കാലമായി ഈ മൂന്ന് കാര്യങ്ങളും കൃത്യമായി പ്രവർത്തിച്ച് പോരുന്നവരാണ് നാം. എന്ത് കൊണ്ട് നമുക്ക് ഈ കാര്യങ്ങൾ തുടർന്ന് നമ്മുടെ ജീവിതത്തിന്റെ ഭാഗമാക്കിക്കൂടാ? വിത്റ് നമസ്കാരം റമളാനിൽ മാത്രം നമസ്കരിക്കാനുള്ളതല്ല. സുബ്ഹിയും അതിന് മുമ്പുള്ള രണ്ട് റക്അത്തും റമളാനിൽ മാത്രമുള്ളതല്ല. സുബ്ഹ് നമസ്കാരത്തിന് മുമ്പുള്ള 2 റക്അത്ത് സുന്നത്ത് നമസ്കാരത്തിന്റെ ശ്രേഷ്ഠതയെപ്പറ്റി നബി (സ്വ) പഠിപ്പിച്ചത് خير من الدنيا وما فيها
എന്നാണ്. അഥവാ ദുനിയാവിനെക്കാളും അതിലുള്ള സകല വസ്തുക്കളെക്കാളും ഉത്തമമാണ് ആ 2 റക്അത്ത്.
  ഇത് പോലെ തന്നെയാണ് നാം അനുഷ്ഠിക്കുന്ന മറ്റ് ആരാധനാ കർമ്മങ്ങൾ, സൽകർമ്മങ്ങൾ, ദാനധർമ്മങ്ങൾ എല്ലാം.. ഒന്നും റമളാനിൽ മാത്രം ചെയ്യേണ്ടതല്ല. സൽപ്രവർത്തനങ്ങളെ ജീവിതത്തിൽ കൂടെ കൂട്ടുക, അവ ജീവിതത്തിന്റെ ഭാഗമാക്കുക.
  കറുപ്പും വെളുപ്പുമാകുന്ന സംഭവങ്ങൾക്കൊണ്ട് നമ്മുടെ ജീവിതമാകുന്ന ആയുസ്സ് നീങ്ങിക്കൊണ്ടിരിക്കുകയാണ്. പ്രശ്നങ്ങളുണ്ടാകും പ്രയാസങ്ങളുണ്ടാകും. അവയിലൊന്നും തളർന്നു മാറി നിൽക്കരുത്. റബ്ബിലേക്കടുത്ത് കൊണ്ട് എല്ലാം അവനോട് പറഞ്ഞ് അവനിൽ ഭരമേൽപ്പിച്ച് മുന്നോട്ട് പോവുക.

  റമളാൻ വസന്തം ഇവിടെ അവസാനിപ്പിക്കുകയാണ്. പ്രതീക്ഷിച്ചതിലധികം സ്നേഹവും സഹകരണവും സഹായവും പിന്തുണയും അഭിപ്രായ നിർദ്ദേശങ്ങളും പരിഹാസങ്ങളും തന്ന സഹോദരങ്ങളെ, സുഹൃത്തുക്കളെ, ബന്ധുക്കളെ, സഹപാഠികളെ, അദ്ധ്യാപകരെ, നന്ദി....!!!
جزاك اللّٰه بأحسن الجزاء... والحمد للّٰه ربِّ العالمين...

  നിങ്ങളുടെ അഭിപ്രായങ്ങളും നിർദ്ദേശങ്ങളും അറിയിക്കുക,
http://wa.me/919207791873